You tell his mammy
If mammies could dae it,
it wid be done
If handoots, hot dinners, clean claes, could dae it
it wid be done
If guid haimes could dae it
it wid be done
If lookin at his photo
and sinking tae yer knees sobbing could dae it
it wid be done
If raging love could dae it
it wid be done.
She disnie tell his faither aboot the money oot her purse
She disnie tell his granny don't pit cash in his birthday caird
She disnie tell his sister watch yer bag hen
She disnie tell her pals oanyhin aboot it
She hugs it aw tae hersel
nurses it in the night.
rockin back n furrit
back n furrit
No ma boy
dear god
no ma boy
Bit if denial could dae it
it wid be done
She didnie cause it
she canny control it
she canny cure it
Bit try telling his mammy
It canny be done.
Maggie Graham